Somo la 7: Misingi ya Unabii

Somo la 7: Misingi ya Unabii

(Ezekieli 28, Isaya 6 & 14, Ufunuo 21)

Somo hili limetafsiriwa kutoka katika Copr. 2025, Bruce N. Cameron, J.D. Kwa wanaotumia lugha ya Kiingereza, marejeo yote ya maandiko yametoka kwenye tafsiri ya ESV® (Biblia Takatifu, English Standard Version®) copyright © by Crossway, wachapishaji wa “Good News Publishers.” Nukuu kutoka kwenye tafsiri ya Biblia ya ESV® inatumika kwa ruhusa ya Wachapishaji. Majibu yaliyopendekezwa yanapatikana kwenye parandesi (kwenye mabano). Kama huwa una kawaida ya kupokea somo hili kwa njia ya barua pepe na likakupotea kwa juma moja, unaweza kulipata kwa kubofya kwenye www.lesoni.blogspot.com kwa lugha ya Kiswahili na http://www.GoBible.org kwa lugha ya Kiingereza na lugha nyinginezo kama vile Kifaransa, Kijerumani. Omba kwa ajili ya uongozi wa Roho Mtakatifu unapojifunza.

Utangulizi: Visa vingi vinahusisha mtu mwenye nguvu (mamlaka) na mnyanyasaji ambaye anawaonea watu wengine. Kisa kinaelezea kwa kina kuhusu wale wanaonyanyaswa, lakini mambo yanabadilika. Mnyanyasaji anapoteza mamlaka na nguvu na anayenyanyaswa anashika hatamu. Je, kuna kisa kama hicho katika Biblia? Vipi kuhusu Kitabu cha Esta? Nadhani hii ni aina ya “mpango wa kulipiza kisasi.” Unabii wa Biblia unafuata mwelekeo huo huo. Shetani anatumikia katika chumba cha Mungu mbinguni, anamuasi Mungu, anasambaza uasi katika sayari ya dunia, na kisha anawatesa wale walio katika uasi. Hata hivyo, baadhi ya watu duniani wanamkataa Shetani, na kuungana na Mungu ambaye kwa hiari yake mwenyewe alikiacha chumba cha Mungu ili kuiokoa dunia. Kisasi kinakamilika pale Shetani anapoangamizwa na wale walio katika sayari ya dunia wanaungana na wale walio katika chumba cha Mungu mbinguni kumtukuza Mungu. Hebu tuigeukie Biblia ili kuthibitisha mtiririko wa kisa hiki!

1.    Shetani Mbinguni

1. 1.    Soma Ezekieli 28:12-14. Hii inamwelezea nani? (Ingawa inamrejelea “Mfalme wa Tiro,” hakuna mwanadamu aliyekuwepo mahala pote pawili, yaani Edeni na “kerubi mwenye kutiwa mafuta afunikaye” katika “mlima mtakatifu wa Mungu.” Hii inaonekana kumrejelea Shetani alipokuwa akitumikia mbinguni.)

1. 1. 1.    Shetani alikuwa na jambo gani la kipekee? (Alikuwa mkamilifu katika uzuri na aliyejaa hekima. Alikuwa katikati ya “mawe ya moto.” Alikuwa mwangalizi.)

1. 1. 2.    Kwa nini basi kurejelea Mfalme wa Tiro? Je, hii imedhamiriwa kuleta mkanganyiko na tunatakiwa kuwa wanafunzi wenye bidii? (Soma Mathayo 16:21-23. Kisa cha Petro kinatuambia kuwa Shetani anaweza kutia msukumo maneno yetu. Ninaamini alikuwepo Mfalme wa Tiro na kwamba matendo yake yaliakisi msukumo wa Shetani. Kutokana na hilo taarifa hizi zinamhusu Shetani.)

1. 2.    Soma Ezekieli 28:15-16. Nini kilimtokea Shetani? (Alikuwa dhalimu na mwenye kukufuru. Alitenda dhambi na kuwa na vurugu. Alitupwa kutoka mbinguni na hakuishi tena miongoni mwa mawe ya moto.)

1. 1. 1.    Unadhani mawe ya moto ni kitu gani? (Kifungu cha 13 kinazungumzia aina ya mawe ya thamani ambayo tunayafahamu hii leo. Ubashiri wangu ni kwamba mawe ya moto hayafanani na chochote tulichowahi kukiona. Ni ya thamani, mazuri, na yanaakisi uwezo wa Mungu. Yana uzuri wa ajabu (usio wa kawaida).)

1. 3.    Soma Ezekieli 28:17. Nini kilisababisha anguko la Shetani? Majivuno kutokana na uzuri wake na tamaa ya utukufu.)

1. 4.    Soma Isaya 14:12-14. Hii inamwelezea nani? (Kwa mara nyingine, mwanadamu asingeweza kuanguka kutoka mbinguni. Ni nadra kwa mwanadamu kudhani kuwa anaweza kwenda mbinguni na kumshinda Mungu. Hii ni rejea nyingine ya Shetani.)

1. 5.    Rudi nyuma na usome Isaya 14:3-6. Hii inamwelezea nani? (Kifungu kinasema “Mfalme wa Babeli.” Lakini hii inafanana na rejea ya Tiro. Tunaangalia msukumo ulio nyuma ya mfalme mwovu, tunasoma kumhusu Shetani.)

1. 6.    Angalia tena Isaya 14:14 na kisha usome Mwanzo 3:4-5. Unaona mfanano gani kati ya jaribu lililosababisha Shetani aanguke na jaribu lililosababisha Eva aanguke? (Wote wawili walitaka kufanana na Mungu.)

1. 1. 1.    Hili linaonekana kuwa jaribu la hatari kuliko majaribu yote. Je, bado jaribu hilo lipo katika zama za leo? Je, jaribu hilo ni tatizo maishani mwako? (Nadhani jaribu hili ni tatizo kwa yeyote anayeyaweka mawazo ya kibinadamu kuwa juu ya mawazo ya Mungu.)

1. 1. 1. 1.    Unawafahamu watu wangapi wanaodhani kuwa Biblia imepitwa na wakati, au imezidiwa nguvu na mawazo na uelewa wa kisasa?

2.   Nguvu ya Kafara

1. 1.    Soma Isaya 6:1-4. Nani anayeita? (Malaika maserafi wanautangaza utukufu wa Mungu.)

1. 1. 1.    Kwa nini misingi inatetemeka kwa neno la malaika? (Soma Ufunuo 15:8. Ujumbe ni kwamba Mungu amezungukwa na nguvu na mamlaka. Ukisoma mjadala wa kisayansi kuhusu kiasi cha nguvu kitakachohitajika ili kutamka na ulimwengu ukawepo, unajua ya kwamba Mungu ana nguvu zisizo na ukomo. Hivi punde nimesikiliza mjadala wa fizikia ambapo mtaalamu alisema kuwa tunayo nadharia ya kutenda mambo ya ajabu (yasiyo ya kawaida), ni vile tu hatuna zana za kuyatenda. Alibainisha nadharia moja iliyohitaji nguvu zinazoizidi nguvu ya jua letu mara kadhaa.)

1. 1. 2.    Utaona kwamba kifungu cha 4 kinatuambia kuwa kusifu huku kimalaika kuliitikisa misingi. Kuna uwezekano wowote kwamba kusifu kwako kunatikisa kitu chochote?

1. 2.    Soma Isaya 6:5. Kwa nini Isaya amekata tamaa sana?

1. 3.    Soma Isaya 6:6-7. Ni kwa jinsi gani “kaa la moto” mdomoni ni jibu kwa aliyekata tamaa? Kwa nini si kitulizo (malhamu) cha mdomo? Kwa nini si neno la upole? (Kaa la moto linawakilisha uwezo wa Mungu. Uwezo wa Mungu unaweza kutuondolea hatia yetu.)

1. 1. 1.    Hebu subiri kidogo. Kifungu cha saba kinarejelea upatanisho wa Yesu kwa ajili ya dhambi zetu. Je, ulinganisho wa kaa la moto ni jambo lisilo la kawaida?

1. 1. 1. 1.    Kaa hili la moto lilitoka wapi? (Kutoka madhabahuni. Mojawapo ya uwezo wa Mungu ni utayari wake wa kujitoa kwa ajili yetu.)

1. 1. 1. 2.    Je, unadhani huu ni uwezo ambao Shetani anaweza kuuelewa? (Utakumbuka kwamba majivuno ndio yaliyokuwa anguko lake.)

1. 4.    Soma Isaya 6:8. Nini kilichosababisha Isaya kubadili gia ya mtazamo wake kikamilifu? (Hatia yake iliondolewa. Anao uelewa wa uwezo wa Mungu.)

1. 5.    Soma Isaya 6:9-10. Je, hili litakutia moyo? (Hili linakatisha tamaa sana. Isaya anataka kwenda kupeleka ujumbe wa Mungu, na Mungu anasema watu hawatamgeukia.)

1. 6.    Soma Isaya 6:11-12. Angalia swali la Isaya. Je, hivi ndivyo ambavyo ungejibu? Au, ungesema, “Kwa hiyo ninaweza kukutendea jambo gani jingine, Mungu, litakalokuwa na mafanikio?” (Isaya ana matumaini kwamba hii ni hali ya muda mfupi.)

1. 1. 1.    Nini kitawasababisha watu kumgeukia Mungu? Maneno ya Isaya? (Hapana. Ni janga.)

1. 1. 2.    Hebu tuliweke hili kwenye mtiririko wa kisa tulichokijadili katika sehemu ya utangulizi. Hili lina “fit” wapi? (Huu ni unyanyasaji wa watu. Walitoa utiifu wao kwa Shetani, na uangamivu ukafuatia.)

3.      Nguvu ya Nguvu

1. 1.    Soma Mwanzo 3:22–24 na Ufunuo 12:7-9. Unadhani Shetani alihitimisha nini kuhusu Adamu na Eva kufukuzwa kutoka Edeni? (Hii ni nguvu halisi inayotumika dhidi ya Adamu na Eva. Nguvu halisi ilitumika dhidi ya Shetani na malaika wake walioanguka pamoja naye. Ubashiri wangu ni kwamba Shetani angelalamika endapo Adamu na Eva wasingefukuzwa.)

1. 1. 1.    Kerubi anatumia nguvu gani kuulinda Mti wa Uzima? (Upanga wa moto. Inahitajika nishati kubwa kuufanya upanga kuwa wa moto. Adamu na Eva wanajua kuwa wameshindwa.)

1. 1. 2.    Kisa hiki kinatuambia nini kuhusu siri ya kuupata uzima wa milele? (Soma Ufunuo 22:1-2. Tunaishi milele kwa kuendelea kula katika mti wa uzima.)

1. 2.    Soma Ufunuo 22:3-4. Mtiririko wa kisa unaendeleaje? (Uovu unaondoshwa kutoka mbinguni na Edeni. Lakini wanadamu watarudi na kuufikia tena mti wa uzima. Kwa nini? Kwa sababu jina la Yesu lipo “katika vipaji vya nyuso zao.” Wamefanya uchaguzi wao kwa ajili ya Yesu.)

4.   Marejeo

1. 1.    Soma Ufunuo 21:1-3. Mambo yamebadilikaje katika sayari ya dunia? (Tuna mbingu mpya na sayari mpya ya dunia. Sasa Mungu anakaa na watu wake duniani. Mungu yu pamoja na wale waliomchagua.)

1. 2.    Soma Ufunuo 21:4. Kitu gani kimetoweka duniani? (Sababu zote zinazosababisha huzuni. Vifo vyote. Mambo yote mabaya yaliyotokana na sisi kumchagua Shetani “yamepita.”)

1. 3.    Ufunuo 21:1 inatuambia kuwa bahari pia ilikwisha. Una maoni gani juu ya hilo? (Mara nyingi bahari inawakilisha hatari kwa wanadamu. Uthibitisho wa hili ni kwamba ingawa bahari inafunika sehemu kubwa ya sayari yetu, wanadamu wana miliki sehemu ndogo sana ya bahari dhidi ya nchi kavu.)

1. 4.    Angalia tena Isaya 14:14 kisha usome tena Mwanzo 3:4-5. Hilo lilitendekaje? (Mtiririko wa kisa chetu unaishia kwa wale wanaotamani kunyakua uwezo wa Mungu na kuishia kushindwa. Lakini Mungu anaonesha uwezo wa kweli kwa kujitoa mwenyewe ili tuweze kukaa naye milele.)

1. 5.    Rafiki, je, utafanya uchaguzi wa kuyatoa maisha yako kwa Mungu? Kwa nini usifanye hivyo sasa hivi?

5.    Juma lijalo: Katika Zaburi: Sehemu ya 1.