Roho na Neno

Somo hili limetafsiriwa kutoka katika Copr. 2011, Bruce N. Cameron, J.D. Marejeo yote ya maandiko yametoka kwenye tafsiri ya New International Version (NIV), copr. 1973, 1978, 1984 International Bible Society, isipokuwa kama itaelezwa vinginevyo. Nukuu kutoka kwenye tafsiri ya Biblia ya NIV inatumika kwa ruhusa ya Wachapishaji wa Biblia wa Zondervan. Majibu yaliyopendekezwa yanapatikana kwenye parandesi (kwenye mabano). Somo limekaa kimtazamo kwamba mwalimu anatumia ubao au sehemu nyingine yoyote ambayo inaweza kuonekana na wanafunzi. Kama huwa una kawaida ya kupokea somo hili kwa njia ya barua pepe na hukulipata kwa juma moja, unaweza kulipata kwa kubofya kwenye www.lesoni.blogspot.com kwa lugha ya Kiswahili na http://www.GoBible.org kwa lugha ya Kiingereza pamoja na lugha nyingine kama vile Kifaransa, Kijerumani. Omba kwa ajili ya uongozi wa Roho Mtakatifu unapojifunza.

Utangulizi: Kati ya mafundisho ya muhimu katika Biblia, mojawapo ya fundisho la muhimu kabisa ni juu ya uelewa wa kazi ya Roho Mtakatifu. Katika Matendo 8:14-17 tunasoma kisa cha waumini wapya waliobatizwa katika jina la Yesu, lakini bado wana upungufu mkubwa sana; kwamba bado “hawajampokea Roho Mtakatifu.” Petro na Yohana “wakaweka mikono yao juu yao, nao wakampokea Roho Mtakatifu.” Je, unao upungufu katika maisha yako ya Kikristo? Je, unafanana na jinsi Wakristo wale walivyokuwa, wakabatizwa, lakini hawakuwa na Roho Mtakatifu? Kiwango cha tatizo kinakuwa wazi zaidi tunapotafakari jinsi Roho Mtakatifu anavyotenda kazi maishani mwetu. Hebu tuanze safari yetu ya kujifunza Biblia ili tuone jinsi Roho Mtakatifu alivyo wa muhimu kupindukia maishani mwetu!

I.                    Roho Mtakatifu na Ufahamu [Uelewa] Juu ya Mungu

A.                Soma 1 Wakorintho 2:13. Kuna tatizo gani kwenye hekima ya mwanadamu? (Ina upungufu. Hata hekima ya kibinadamu itakuambia kuwa hekima ya Mungu inapaswa kuwa kubwa kuliko hekima ya viumbe walioumbwa na Mungu.)

B.                 Soma 1 Wakorintho 2:14. Wakristo tunakabiliwa na tatizo gani kubwa ikiwa hatutakuwa na Roho Mtakatifu? (Hatuwezi kuyaelewa mambo ya Mungu.)

1.                  Kuna wachekeshaji wengi maarufu pamoja na watu wanaojiita wasomi wanaoudhihaki Ukristo. Kila ninaposikia hii dhihaka huwa ninakasirika. Je, ninapaswa kukasirika? Au, je, ninatakiwa tu kuwa na hisia nyinginezo? (Kifungu hiki kinafundisha kwamba ni jambo la kawaida kwa mwanadamu kudhani kuwa Ukristo ni “upumbavu” ikiwa mtu huyo hana Roho Mtakatifu. Ingawa ninadhani baadhi ya wadhihaki hawa wamejawa ushawishi wa pepo, jambo la kawaida kwa hekima ya mwanadamu ni kushindwa kuyaelewa mambo ya Mungu.)

C.                 Soma 1 Wakorintho 2:15. Inamaanisha nini kusema kwamba “hatutambuliwi na mtu” kwa muktadha wa kile ambacho tumekuwa tukijifunza? (Watu ambao hawaongozwi na Roho Mtakatifu watadhani kuwa sisi ni wapumbavu, lakini hatutakiwi kuwasikiliza wala kuwazingatia kwa sababu hatuko chini yao. Hawana uwezo wa kuwa na uamuzi sahihi juu yetu.)

II.                 Roho Mtakatifu na Neno la Mungu

A.                Soma 2 Petro 1:19-21. Tunaona tofauti gani hapa kati ya hekima ya mwanadamu na fikra ya mwanadamu inayoongozwa na Roho Mtakatifu? (Hakuna unabii wa Biblia ambao asili yake ni hekima ya mwanadamu. Badala yake, wanadamu walinena maelezo [matukio] ya siku zijazo yaliyotoka kwa Mungu “wakiongozwa” na Roho Mtakatifu.)

B.                 Soma Zaburi 95:7-9 na ulinganishe na Waebrania 3:7-9. Nini chanzo cha hii sehemu ya kitabu cha Zaburi? (Roho Mtakatifu! Tunaona kwamba Roho Mtakatifu ndio msingi wa uandikwaji wa Biblia.)

III.              Roho Mtakatifu na Utatuzi wa Tatizo

A.                Soma Danieli 2:1-3. Chukulia kwamba ulikuwa miongoni mwa wanajimu wa Mfalme, je, ungemwuliza swali gani?

B.                 Soma Danieli 2:4-5. Kama ilivyotarajiwa ni kwamba wanajimu wana swali lile lile kama tulilonalo, “Tuambie ndoto yako.” Unadhani kwa nini mfalme alichukua hatua ngumu kiasi hicho kwa wanajimu? (Lazima itakuwa mfalme alikuwa na mawazo ya aina mbili. Kwanza, hii ni ndoto ya muhimu sana ambayo anataka aielewe kwa usahihi. Pili, hakuwaamini washauri wake. Angeweza kuwajaribu endapo walikuwa wanasema ukweli kwa kuthibitisha kuwa wangeweza kuirudia ile ndoto kwa usahihi.)

C.                 Soma Danieli 2:11-12. Unaichukuliaje afya ya akili ya mfalme? Je, mfalme ana wazimu, au hizi ni hisia za kawaida kwa kundi hili la “wenye hekima” ambao mfalme amekuwa akiwawezesha kifedha?

D.                Soma Danieli 2:13-15. Sasa jiweke kwenye nafasi ya Danieli. Je, hili ndilo swali ambalo ungeuliza?

E.                 Soma Danieli 2:16. Ombi la Danieli lina nadharia gani ndani yake? (Kwamba anaweza kutoa tafsiri ya ndoto.)

1.                  Tafakari hatari ya kumwendea mfalme. Mlinzi wa mfalme anawatafuta wenye hekima ili awaue!

F.                  Soma Danieli 2:17-18. Linganisha maelezo ya Danieli na kauli ya wenye hekima – miungu pekee ndio wanaojua jibu. Hii inatuambia nini? (Danieli pamoja na wale wengine wenye hekima walikubaliana – kwamba hili ni suala la miungu. Tofauti iliyopo ni kwamba Danieli anaamini kuwa anaweza kumfikia Mungu, na Mungu atamsaidia.)

1.                  Je, umewahi kupita uzoefu wa jambo la kutisha lililojaa msongo zaidi ya hili – kwamba serikali imeamua kukukata vipande vipande na kuangamiza nyumba [familia] yako ikiwa utashindwa kutoa majibu sahihi?

G.                Soma tena Danieli 2:11. Utaona wenye hekima wanasema kuwa miungu hawana kikao na wenye mwili. Je, hii ni kweli kwa mujibu wa Mungu wako? (Soma Yohana 14:17, Warumi 8:11 na 1 Wakorintho 6:19. Vifungu hivi vinatuambia kuwa Roho Mtakatifu anakaa ndani yetu! Hivyo, zaidi ya miungu kukaa “miongoni” mwa wanadamu ni kwamba Mungu anakaa “ndani” yetu!)

1.                  Ikiwa, kama ilivyokuwa kwa Danieli, ulikuwa na tatizo la taarifa, na maisha yako yalikuwa hatarini, je, ungekuwa na uelewa wa Mungu kwa kuwa tu Roho wa Mungu anakaa ndani yako?

H.                Soma tena Danieli 2:18. Je, msaada wa Roho Mtakatifu ni wa moja kwa moja pasipo kufanya jambo lolote? (Kwa dhahiri unatakiwa kuuomba. Danieli na marafiki wake watatu “waliomba rehema” ili kwamba Mungu awapatie jibu.)

I.                    Soma Danieli 2:19. Kwa nini jibu lilimjia Danieli wakati wa usiku? Kwa nini halikumjia mara moja? (Soma Danieli 2:22-23. Roho Mtakatifu akaaye ndani yako hakujazi maarifa yote ya Mungu moja kwa moja. Badala yake, tunamwomba Mungu atupatie uwezo [taarifa] wa kutatua matatizo naye anatupatia taarifa tulizomwomba.)

1.                  Zamani nilikuwa ninadhani kwamba Roho Mtakatifu alikuwa “anakaa ndani yangu” ili kunisaidia kwenye masuala ya kiroho pekee. Angalia Yohana 16:8. Je, hiyo ni kweli? (Si kwa mujibu wa kisa hiki. Roho Mtakatifu alimsaidia Danieli kwa matatizo yaliyohusiana na kazi yake.)

IV.              Roho Mtakatifu na Mpango Mkakati

A.                Soma Yohana 16:12-13. Tumejadili wazo hili, kwamba Roho Mtakatifu akikaa ndani yetu anaweza kujaza akili zetu maarifa yote ya Mungu. Yesu anatoa sababu gani za jambo hilo kutotendeka? (Tusingeweza kustahimili. Kuna aina fulani hivi ya kipimo cha Mungu ambacho kinashiriki nasi maarifa ambayo tunaweza kuyastahimili. Kimsingi Yesu anasema “Siwezi kuwaambia sasa hivi kwa sababu hamwezi kustahimili, lakini siku zijazo Roho Mtakatifu atayaongoza mawazo yenu kuwa na maarifa makubwa zaidi.)

1.                  Yesu anaposema kuwa Roho Mtatatifu “atatuongoza kwenye kweli yoye,” je, hiyo inamaanisha kuwa hatimaye tutafahamu kile anachokijua Mungu?

B.                 Soma Yohana 16:13-15. Hii inaashiria nini kuhusu maarifa ya Roho Mtakatifu? Je, maarifa yake ni pungufu ya maarifa ya Mungu Baba? Roho Mtakatifu anachukua tu mambo ambayo anayasikia kwa mbali, na hayo ndio yanayoletwa kwetu?

C.                 Soma 1 Wakorintho 2:10-11. Hii inatufundisha nini kuhusu undani wa maarifa ya Roho Mtakatifu? (Vifungu hivi vinatuambia kuwa hakuna kitu chochote ulimwenguni kinachoyafahamu mawazo ya Mungu vizuri zaidi ya Roho Mtakatifu! Kwa dhahiri, Roho Mtakatifu “hachukui [haokotiokoti] tu mambo.”)

D.                Soma 2 Wakorintho 3:17-18. Hii inatufundisha nini kuhusu asili ya msingi ya Mungu? (Kwamba Bwana “ni Roho.” Kama sehemu ya Utatu Mtakatifu, Roho Mtakatifu ni Mungu kamili. Ni dhana potofu kudhani kuwa Roho Mtakatifu hajui kile ambacho Mungu Baba anakijua. Badala yake, nadhani tunapaswa kuelewa jambo hili la “yote atakayoyasikia” kumaanisha kwamba Utatu Mtakatifu hujadili na kuamua ukweli wote tunaotakiwa kuujua. Inahusiana na upungufu wetu, sio upungufu wa Roho Mtakatifu.)

1.                  Tunaposoma kwamba Roho Mtakatifu “atatuongoza” kwenye “kweli yote,” je, hiyo inaashiria wajibu gani kwetu? (Sio kukaa tu! Kama Danieli na marafiki wake walivyomwomba Mungu awadhihirishie ndoto ya ajabu [ya kimiujiza], vivyo hivyo nasi tunatakiwa kuungana na Roho Mtakatifu katika kuitafuta “kweli yote.”)

2.                  Utaona kwamba 2 Wakorintho 3:17-18 pia inarejea “uhuru” na “nyuso zisizotiwa utaji.” Unadhani hii inaashiria nini juu ya kazi ya Roho Mtakatifu? (Roho Mtakatifu anavyotusaidia kuelewa vizuri zaidi mapenzi ya Mungu kwa ajili ya maisha yetu, hii hutuweka huru dhidi ya kutoelewa torati ya Mungu.)

E.                 Rafiki, je, unaye Roho Mtakatifu maishani mwako? Ikiwa huna uhakika, kwa nini usimwombe Roho Mtakatifu akae ndani yako. Na jambo jema zaidi ni kwamba, kwa nini usimwombe mchungaji wako akuwekee mikono na kukupatia hii zawadi ya muhimu kutoka kwa Mungu?